Flestu smáfuglar eru spurvafuglar. Teir hava allir langan fót-legg og eina tá, sum vendir aftureftir, og tríggjar tær, sum venda frameftir.
Táin, sum vendir aftureftir, verður nevnd baktáin. Hon er stór og liðilig og væl egnað at taka um greinar, tá ið fuglurin situr í trøum.
Urtagarðar og viðarlundir
Nógv sløg av smáfugli eru komin til Føroya, síðan viðarlundir eru komnar, og fólk eru farin at fáa sær urtagarð. Urtagarðar og viðarlundir eru góð støð hjá nýggju sløgunum at seta búgv.
Við tíðini síggjast hesir fuglar eisini á støðum, har ongi trø og runnar vaksa. Tí er smáfuglur eisini at síggja millum heiðafugl og fugl í fuglabjørgum.
Føroyar eru norðasta staðið, har fleiri av fuglasløgunum, sum síggjast í viðarlundum og urtagørðum, eru.
Vanligasti smáfuglur, sum eigur í Føroyum:
Stari . . . . . . . . . . . . . . . . . . . . . 25.000 pør
Gráspurvur . . . . . . . . . . . . . . . . 2.700 pør
Grátítlingur . . . . . . . . . . . . . . . . 2.500 pør
Títlingur . . . . . . . . . . . . . . . . . . . 1.500 pør
Steinstólpa . . . . . . . . . . . . . . . . . 1.500 pør
Músabróðir . . . . . . . . . . . . . . . . . . 725 pør
Kvørkveggja . . . . . . . . . . . . . . . . . 600 pør
Onnur sløg, eitt nú bringureyði, óðinshani, Erla kongsdóttir, lerkur og svala, eiga eisini í Føroyum, men pørini eru fá í tali, einans 2-15.